Buvayda tumani Madaniyat markazi Tantanalar saroyida 15 aprel — Madaniyat va san’at xodimlari kuni munosabati bilan tantanali bayram tadbiri bo‘lib o‘tdi. Tadbirni tuman hokimi Behzodjon Ibragimov ochib berdi. O‘z nutqida u madaniyat va san’at sohasida faoliyat yuritayotgan fidoiy insonlarni samimiy tabriklab, ularning jamiyat ma’naviy-ma’rifiy hayotidagi o‘rni beqiyos ekanini ta’kidladi. Shuningdek, tuman hokimi tomonidan soha vakillaridan bir guruhiga faxriy yorliqlar, esdalik sovg‘alari va tashakkurnomalar topshirildi. Tadbir davomida tuman san’atkorlari ishtirokida bayramga munosib konsert dasturi namoyish etildi. Madaniyat va san’at sohasining fidoyi xodimlariga ko‘rsatilayotgan e’tibor ularning kelgusidagi faoliyatiga yangidan-yangi kuch va ilhom bag‘ishlashi shubhasiz.