Quvasoy shahrining “Yangiobod” mahallasida katta hashar o‘tkazilib, mahalla ahli obodonlik yo‘lida jipslashdi. Hasharda nuroniylar boshchiligida fuqarolar o‘z tashabbuslari bilan mahalla ko‘chalarida piyodalar yo‘lagini barpo etish ishlarini boshlab yubordilar. Tashabbuskor fuqarolarni qo‘llab-quvvatlash maqsadida shahar hokimi Zafarjon To‘raqulov hashar o‘tkazilayotgan joyga tashrif buyurdi. U mahalla aholisi bilan samimiy suhbatlashib, fuqarolarning bunyodkorlikka bo‘lgan intilishi va jamoaviy mehnatini yuksak baholadi. Hozirda yurtimiz bo‘ylab o‘tkazilayotgan “Tozalik va ozodalik oyligi” doirasida ko‘plab hududlarda obodonlashtirish ishlari amalga oshirilmoqda. “Yangiobod” mahallasi aholisi tomonidan boshlangan ushbu hashar esa, mazkur ezgu tashabbusning amaldagi ifodasiga aylandi. Shahar hokimi suhbat davomida yangi barpo etilayotgan piyodalar yo‘lagi bo‘ylab quyosh panelli yoritish chiroqlari o‘rnatilishini ta’kidladi.