Besh kun davomida Qirg‘iz respublikasining Issiq ko‘l viloyatida sportning futbol turi bo‘yicha xalqaro turnir o‘tkazildi. Unda mezbon davlat vakillari bilan, Qozog‘iston, Tojikiston Respublikalari va mamlakatimiz futbolchilari ishtirok etishib, g‘oliblik uchun bahs olib borishdi. Viloyatimiz shaharifini munosib himoya etishda ishtirok etgan quvasoylik o‘quvchilar chiroyli kombinatsion o‘yinlarni namoyish qilib, kuchli zarbalari va o‘ziga xos taktikalarni amalda qo‘llagan holda maydondagi harakatlari bilan muxlisu mutaxassislarda katta taasurotlar qoldirishdi. 10-12 yoshli futbolchilar o‘rtasida o‘tkazilgan uchrashuvning yakuniy final bahsida quvasoylik o‘quvchilar Qirg‘iz Respublikasining "Alay" jamoasi bilan bahs olib, 4:3 hisobida g‘alabaga erishishdi. Va yangi O‘zbekiston yoshlarining imkoniyatlari yuqori ekanligini amalda ko‘rsatishdi. Ma’lumot o‘rnida, Quvasoy shahridagi 1-, 2-, 3-, 10-, 12-, 13-,15- va 19-maktab o‘quvchilari mazkur musobaqada munosib ishtirok etdilar.