Sertifikat talabi: ishdan bo'shatishda turlicha yondashuvlar Amaliy faoliyatda shunday vaziyatlar uchraydiki, xodimni ishdan bo'shatishga asos bir xildek ko'rinsa-da, aslida turlicha huquqiy normalar qo'llaniladi. Bu, ayniqsa, ma'lum bir lavozimni egallash uchun maxsus ruxsat yoki sertifikat talab qilinganda yaqqol namoyon bo'ladi. Birinchi holat: sertifikatsiz ishga qabul qilingan xodim Agar belgilangan lavozim uchun alohida sertifikat zarur bo'lsa va bu talab avvaldan huquqiy hujjatlarda mustahkamlangan bo'lsa, unda sertifikatga ega bo'lmagan nomzodni ishga qabul qilish qonunbuzarlik hisoblanadi. Agar bunday holat aniqlansa va xodimni boshqa to'g'ri keladigan lavozimga o'tkazish imkoni bo'lmasa, u holda mehnat shartnomasi Mehnat kodeksining 168-moddasi 1-qismi 4-bandi asosida — ya'ni “ishga qabul qilish tartibi buzilgani” sababli bekor qilinadi. Ikkinchi holat: ish jarayonida sertifikati bekor qilingan xodim. Ba'zida xodim lavozim talablariga to'liq javob berib, tegishli sertifikatga ega holda ish boshlashi mumkin. Biroq ish jarayonida qandaydir sabablarga ko'ra uning sertifikati o'z kuchini yo'qotsa, vaziyat mutlaqo boshqacha baholanadi. Bu holda mehnat munosabatlarini davom ettirish uchun huquqiy to'siq yuzaga kelgan bo'ladi. Shuning uchun xodim bilan mehnat shartnomasi MK 168-moddasi 1-qismi 5-bandiga asosan — ya'ni “mehnat munosabatlarini davom ettirishga monelik qiluvchi holat yuzaga kelgani” sababli bekor qilinishi mumkin. Bir qarashda ikki holat ham “sertifikat masalasi”dek tuyulishi mumkin. Ammo ularning huquqiy natijalari va qo'llaniladigan normalari mutlaqo turlicha. Ish beruvchilar va kadrlar bo'limi mutaxassislari bunday nozik farqlarga albatta e'tibor qaratishi kerak. O'ktamjon Ergashev - So'x tumani adliya bo'limi bosh maslahatchisi