1. Бош сахифа
2. Янгиликлар

ШАЪНИНГИЗНИ УЛУҒЛАМОҚ БАХТ

×

Бугун 30.09.2022 йил куни Қувасой шаҳар Арсиф МФЙ ҳудудидаги “Санъат саройи” тантаналар залида мўътабар устозларга бағишлаб маънавий-маърифий тадбир ўзгача ташкилланиб, бино байрамона безатилиб, устозлар учун байрам дастурхон ёзилди.

Дастлаб тадбирни Қувасой шаҳар ҳокими З.Тўрақулов очиб берди.

- Қадрли ва мўътабар устозлар!

   Мустақил диёримизнинг келажаги бўлмиш фарзандларимизнинг азиз мураббийлари!

Сизларни муборак аём , 1 октябр- Ўқитувчи ва мураббийлар куни умумхалқ байрами муносабати билан самимий қутлайман. Ушбу байрам республикамизда катта тантаналар билан нишонланмоқда. Зеро, сизларнинг машаққатли ҳамда масъулиятли вазифангиз инсондан тенгсиз олийжанобликни, сабр-бардошни талаб этади. Дарҳақиқат, дунёда устоз деган шарафли мақомга эга бўлишнинг ўзи бир бахтдир. Буюклик сизлардан бошланади. Сизлар ҳар бир миллатнинг ифтихорини, ватан туйғусини миллий урф-одатлари ва маънавий бойлигини аждодлардан авлодларга етказувчи, шунингдек, ҳур фикрли, маърифатли инсонларни тарбияловчи буюк зотсизлар.

 Шундай экан бугун давлатимиз сизларнинг зиммангизга ватан учун жонини фидо қилувчи, ватанпарварлар, фидокорлар, қалбида энг улуғ қадриятларга нисбатан ҳурмат-эҳтиром туйғуларини жо қилувчи ёш авлодни тарбиялашдек вазифани қўймоқда. Мана шундай масъулиятли ишингизда барчангизга муваффақиятлар тилайман. Ҳамиша соғ омон бўлинглар” , –дея тилак билдирди.

 Шундан сўнг шаҳар ҳокими ва сектор раҳбарлари томонидан Қувасой шаҳар ҳокимлигининг 1-октябр - Ўқитувчи ва мураббийлар куни умумҳалқ байрами муносабати билан “Ёш авлодни таълим тарбияси йўлида фидокорона меҳнат қилиб, уларнинг камол топиши ҳамда ватанимиз равнақи йўлида муносиб ҳисса қўшиб келаётганликлари учун” бир гуруҳ фахрий устозлар ҳамда шаҳримиздаги умумтаълим мактабларида фаолият олиб бораётган ўқитувчилар Фахрий ёрлиқ ҳамда эсдалик совғалари билан тантанали равишда тақдирландилар.

 Тадбирда фахрий устозлар Олий тоифали муаллим, Ўзбекистон халқ маориф аълочиси Баҳромжон Хидиров, Маънавият тарғиботчиси Тохиржон Ўринбоев, Халқ депутатлари вилоят Кенгаши депутати, Вилоят хотин-қизлар Гендер тенглиги масалалари бўйича комиссия раиси Дилоромхон Меҳмонова ҳамда шаҳар ҳокими ўринбосари-оила ва хотин-қизлар бўлими бошлиғи Нигорахон Убайдуллаевалар сўз олиб, барча устоз ва мураббийларни касб байрамлари билан табриклаб, самимий тилакларини билдирдилар.

 Тадбирга таклиф этилган Хоразм филормонияси хонандалари, Қувасой шаҳрида фаолият олиб бораётган маданият маркази хонандалари томонидан дилрабо куй ва қўшиқлар, “Жозиба” рақс гуруҳи раққосалари томонидан гўзал рақслар ижро этилди. 

Шу кунги ўтказилган байрам тадбири барча устоз, мураббийлар ва қадрдонлар қалбида узоқ вақт эсда қоларли бўлди.

Бизни ижтимоий тармоқларда кузатинг
Facebook, Telegram, Twitte, YouTube, Instagram