Туркия савдо палаталари ва товар биржалари иттифоқи раиси Мустафо Рифат ҲИСОРЖИҚЛИ ЎҒЛИ Президент Шавкат Мирзиёев билан учрашувдан сўнг ЎзА мухбирига қисқача интервью берди:
×
![]()
2019-10-05 06:58:53 137
– Аввало, ота юрт Ўзбекистонга келганимдан ғоят мамнун эканимни таъкидламоқчиман. Президент Шавкат Мирзиёевнинг Ўзбекистонда Туркий тилли давлатлар Ишбилармонлар кенгаши мажлиси ва Инвестиция форумини ўтказиш ташаббусидан жуда хурсандмиз.
Биз тадбиркор сифатида сўнгги уч йилда Ўзбекистонда амалга оширилаётган ислоҳотларни кузатиб бораяпмиз. Мамлакатингизнинг танлаган йўли тўғри, амалга оширилаётган ислоҳотлар мавжуд салоҳиятга мос. Барча ўзгаришлар жадаллик ва катта жасорат билан рўёбга чиқарилмоқда. Бунинг натижасида Ўзбекистон минтақада порлаётган юлдуз бўлишига ишонаман. Мулоқот чоғида бу борадаги фикрларимни давлатингиз раҳбарига ҳам айтдим.
Тадбиркорлар халқ фаровонлигини таъминлайди. Туркия Ўзбекистонда энг кўп корхона очган давлатлар ичида учинчи ўринни эгаллайди. Тошкентда ўтадиган нуфузли анжуманга 120 нафар ишбилармон билан келдик. Форумга Озарбайжон, Қозоғистон ва Қирғизистондан ҳам компания ва фирмалар вакиллари, бизнесменлар ташриф буюрган.
Президент Шавкат Мирзиёев ташаббуси билан илк маротаба ўтказилаётган анжуманлар туркий тилли давлатлар вакилларига ўзаро ҳамкорлик истиқболларини муҳокама қилиш, янги ҳамкорлар топиш ва бизнесда амалий алоқаларни кенгайтириш имконини беради.
